تعالوا نتعرف على بعض

أبوحفص كتب:أخى الكريم ....رجل المستحيل

شكرا على كل ما قدمته لى من مساعده ..

انا بلغت سلامك فعلا للشيخ سعد ....وطلب منى ان اقرءك السلام منه ....
وطلب منى اسئلك ...حافظ كام جزء من القرءآن ؟؟؟

bookworm كتب:بسم الله الرحمن الرحيم

اولا السلام على كل الى بيقرا الرسالة دى
أنا اسمى نرمين
فى العشرينيات من العمر
انهيت بحمد الله -سبحانه وتعالى
دراستى فى كلية الألسن -جامعة عين شمس
قسم الانجليزى
صحيح مش بتفوق
بس الحمد لله انى شوفت اليوم دة وخلاص!!!!!!
طبعا من غير كلام هوايتى الاولى هى القراءة بكل انواعها
و متتخيلوش سعادتى لما دخلت موقع رويات من الشتا الى فات اول مرة
و اول حاجة عملتها طبعا انى خليت الموقع
my home page
أى صفحة النت الاساسية
و مع انى استغربت لما اتحول الموقع لمنتدى
و منكرش انى اديقت شوية
لانى مش بكره التغير
بس بخاف منه شوية
إلا انى لاقيت-و الحمد لله
ان التغير كان إجابى واحسن من الاول
مش عاوزة اكون طولت عليكم
شكرا لكل الى ساهم فى الموقع دة
و الى الأخ
إيهاب
بقولك ان طبيعى مش هتلاقى زوار فى المنتدى كتير
لانه منتدى ثقافى من الدرجة العالية
مش منتدى هلس كالمعتاد
و طبعا و بما انك عايش فى دولة عربية عريقة
عارف مستوى العرب الرهيب و موقفهم من الثقافة
و خوفهم من كل ما يتصل بها !!!!!!!!!!!!!!!!!!!
للأسف
احب اشوف راسيلك دوما وردك على
و الى الكل الف شكر وتحية
و خاصا الصديقة بافى
الى طرحت فكرة التعرف
و شكرا لكل الى اقتطع من وقته عشان يقرا رسالتى
السلام عليكم ورحمة الله وبركاته

buffy كتب:

ازيكوا يا جماعه وازيك يا نرمين انا فرحانه مووووووووووت ان فى بنت دخلت وعرفت بنفسها علشان انا كنت حاسه ان الولاد هما القوه العظمى فى المنتدى وانتى فعلا عندك حق ان المنتدى اكتر من رائع وانه مختلف عن كل المنتديات علشان بيتكلم عن اكتر حاجه الواحد بيحبها وهى الكتب وعلى فكره انا اسمى ساره انا نسيت اقوله فى اول مره وشكرا جدا للاخ ابو حفص انه فكرنى واتمنى ان كل بيحبوا الكتب والمنتدى يدخلوا ويعرفونا عليهم وانا عندى بقى اقتراح جديد ممكن يشجع الاعضاء انهم يدخلوا ويعرفونا عليهم انا بقترح ان احنا نتناقش فى موضوع سواء موضوع كتاب او اى موضوع تانى ايه رايكوا وعموما لو الفكره عجبتكوا انا هسيب الموضوع اللى هنتناقش فيه االى هيرد بعدى

ها يترى بقى ايه هو الموضوع

أنا شايف فى عنصرية و تحيز فى المكان .. ما علينا

bookworm كتب:ازيك يا سارة

فعلا فكرة عبقرية
ان يكون فى موضوع او عدة مواضيع نتناقش فيها على التوالى
و بكدة نحمس الأعضاء انهم يدخلوا و يشاركوا برايهم
و انا عن نفسى بقترح اننا ناقش موضوع الثقافة فى البلاد العربية فى مقابل الالثقافة فى بلاد الغرب
افتكر دة موضوع مناسب للمنتدى
و لا ايه
شكرا لاتساع وقتكم لقراية رسالتى
على فكرة لو الموضوع معكبجمش انا روحى رياضية و مش هزعل خالص
يلا سلام
و سلام خاص ليكى يا سارة

لكن طالما هى فكرتك .. ابدئى موضوع باسمك فى منتدى مناقشة الروايات ..

silver_hawk0018 كتب:السلام عليكم ورحمة الله وبركاته

انا اسمى هيثم
وعندى 20 سنة ومن اسكندرية
وانا فى كلية حقوق سنة ثالثة
طبعا برضه زى اللى سبقونى انا مهنتى فى الحياة انى اعبد ربنا وبعد كدة اقرا واستفيد وانا بحاول انى اقرأ فى كل المجالات
يعنى معلومات عامة
وانا بحب اووووووى روايات رجل المستحيل وما وراء الطبيعة وبموت فيهم لدرجة انى عندى تقريبا كل الاعداد وعاملهم مكتبة
يعنى عشان مطولش عليكم انا سعيد جدا بالمنتدى دا ويا رب يبقى احسن منتدى

buffy كتب:

ازيكوا تانى يا جماعه موضوع حلو جدا يا نرمين وفى مجال كبير للمناقشه وبعدين حتى لو الموضوع مش عجبنى انا عمرى ما اقدر ارفض ليكى موضوع وازيك يا هيثم نورت المنتدى وانا عن نفسى بمممممممممممممممممممممموت فى ماوراء الطبيعه وعندى برضه كل الاعداد ولغايه اخر عدد بس فى رايى ان عدد الحلقات المنسيه مش حلو زى بعد منتصف الليل ولا انتو ايه رايكوا

يلا سلام

bookworm كتب:Hi again

باين ان احنا الوحدين الى ساهرنين فى المنتدى
ازيك تانى يا سارة
انا بردوا بمووووووت فى حاجة اسمها ما وراء الطبيعة
و بعشق شخصية رفعت اسماعيل
اما بالنسبة للأستاذ احمد خالد توفيق
فحدث ولا حرج
انا بعتبره استاذ حقيقى عرف ازاى يوصل لقلوب وعقول الشباب
فى زمن ماحدش بقا طايق القراية!!!!
اما بالنبة للحلقات المنسية فهى بردوا معجبتنيش قوى
بس انا لسة مكملتهاش
بس انا شايفة يا سارة انا عدد
بعد منتصف اليل كان تحفة
و بعتبره من اجمل الاعداد
لانه فكرة جديدة فى التاليف
و اسلوب مختلف
اسلوب المكالمات التليفوننية والإعتماد على وصف المؤثرات الصوتية
دة غير ان كان فيه قصص حلوة فعلاة ومشوقة بدرجة كبيرة

silver_hawk0018 كتب:

شكرا ليكم يا جماعة على ترحيبكم بيا وبجد انا سعيد انى اتعرفت بيكم وياريت نبقى صحاب يا رب

والله يا بافى انتى قولتى اللى فى دماغى لان مهما د.احمد خالد توفيق كتب انا هفضل احبه لان اسلوبه فى الكتابة لذيذ اوى ومحدش غيره بيكتب بالاسلوب دا

بالنسبة ليك يا رجل المستحيل شوف انت اى وقت هتنزل فيه اسكندرية وتشرفنى فى اى وقت وانا مستنيك عشان تشوف حلاوة اسكندرية ومع انى اسكندرانى الا انى بحب اسكندرية اكتر فى الشتا

عشان الهدوء ومفيش زحمة بتبقى هادية وبيبقى الجو لذيذ

شكراً على دعوتك يا هيثم

و على فكرة .. ممكن تلاقينى فى أى وقت عندك ..

استنى بقى جرس الباب ..

حقيقى إن شاء الله ممكن أجيلك آخر الصيف .. عشان أشوف إسكندرية فى بداية الشتاء عاملة إزاى

هبقى أرتب معاك ميعاد ..