مغامرات خريج

انا وانت والروتين

اولا وقبل كل شئ احب اعرفكم بنفسى

العبد الفقير الى الله /واحد من الناس

المهنة / عاطل بعد الحصول على بكالوريوس التجارة بتقدير جيد

بيانات اخرى / لا تهم القارئ الكريم فى شئ

( مقدمة وملخص لابد منهما )

اكتب اليكم هذه السطور وانا جالس ادخن لاحكى لكم عن المهازل التى مررت بها عند اسخراج احدى الاوراق المهمة من الجامعة

البداية / .................................................

قال لى ابى وهوجالس يحاورنى بعد العشاء المتين :ايه رأيك لو تسافر بكره الى بنى سويف لاستخراج بيان الدرجات وهو ادينا بنسعى

انا / ياعم الحج انت مش واخد لبالك ان الاعلان مش محددين تقدير يعنى من الاخر شكلهم محتاجين واحد معين من الناس المهمين ابناء الناس المهمين وعاملينها ال اايه حجة ان التقديم مفتوح للكل وكانهم بيوضحوا انها حرية مكفولة للجميع

ابويا / يابنى انت فقرى وملاوع ليييه انا عمرى ماشوفت خلفة بالنيلة اللى انت فيها دى متروح تجيب ورقك وتسعى زى مخاليق الله ولا انت هتستنى لما يبعتوا لسيادتك وانت قاعد هنا فى حجر امك......

المهم خت الموضوع من قصيره وحاولت انهى النقاش اللى واضح انى مش هكسبه الا بالطريقة دى وكان التالى

انا / طب هات فلوس اصل انا ممعاييش وانت عارف ان الورق فى مصر والا مضائات الكريمة ميمشيش الا بالفلوس الكريمة هى رخره

ابويا / يابنى هو انت مش معاك فلوس انا مديهالك اللى كنت هتجيب بيها العدة

انا / اه بس دا ماله ومال المشوار ده

ابويا / (متحايلا متلاوعا ومتلاعبا بيا )يابنى هى الدنيا هتطير روح بالفلوس اللى معاك وربنا يفرجها

انا / (وقد بدأ الخوف يجد الطريق السليم الى قلبى وجيبى ) ماشى ياعم الحج ان شاء الله بعد العيد اروح على طول

ابويا / (وهو يزفر من الغيظ)لاحول ولا قوة الا بالله انت هتفضل مرخم لحد امتى يابنى بقولك روح قبل الزحمة عشان تخلص ورقك بدرى بدرى

انا / ( متسائلا فى سرى هوا مالوا ابوبيا عمال يزحلق فيا لييه) خلاص يا حج على البركة (وانسحبت من النقاش والمجادلة المنتهية اساسا من قبل ما تبدأ الملم ديول الهزيمة انعى بحسرة الفلوس اللى هتخلص هناك حيث السفاحين والافاقين وولاد ال ال ال ...........ولا بلاش )

المهم يجماعة انا جيت نازل اهرب من البيت لقيت ابويا مطرطرلى نصه الفقانى من البلكونة ( لا مؤاخذه ياحج ) وبيقولى رايح فين

(وقبل ما ارد لقيته بيقلى / اوعى تتاخر عشان تلحق قطر الساعة 4 الصبح ( وهنا اعزائى الكرام كاد مخى يضرب هو ابويا كمان لحق يحدد ميعاد القطر بس ياسيدى رحت واخد الكلمتين فى جنابى ورحت غاير على محمود فى المكتبة - ومتسالونيش مين محمود وايه دوره والكلام اللى يغيظ ده-

المهم انا كنت نايم – طبعا بعد ما رجعت من عند محمود- واذا بالف الف من الايادى تهزنى وانا مطنش فاذا بالاياد تبدا بالنغز وهنا استعير كلا م بوحة العزيز ( الغز مش هنا ياعم الحج ) فاذا بى الاقى ابويا واقف على راسى كالملاك الحارس او بمعنى ادق كمحمد على كلاى وهو واقف على راس خصم بعد ان هلكه عجن يعلن انتصاره وهو بيقلى قوم يلا عشان تلحق القطر – طبعا ابويا مش كلاى والحمد لله –

انا / هى الساعة كام دلوقتى

ابويا / خلاص فاضل على القطر ربع ساعة ( رحت منطور من السرير الى الحمام فى قفزة واحدة مش عارف ازاى محاولا ان اخد دش عالسريع عشان اعرف انا فين ومين وايه اللى جابنى هنا اساسا واذا ابويا يخبط عالباب

ابويا / هتعمل ايه يابنى

انا / هاخد دش طبعا مش معقول يعنى هاقلع هدومى عشان حاجة تانية

ابويا / انت اتجننت تعيا ياحيوان ( واضح انه بيخاف على صحة الحيوان ) المهم اتشطفت اى كلام وطلعت لقيت الساعة 3 كدت ان افرقع فى وشه او اصاب بشلل رباعى قائلا هو دا وقت هزار يابويا على الصبح اوعلى الليل اللى احنا فيه ده

ابويا ( متجاهلا أيـياى تمام تعيش وتاخد غيرها ) انا هاطلع اعملك كباية شاى عشان تفوق واياك اجى الاقيك نمت

انا / وهو بعد اللى انت عملته ده فيها نوم تانى (وفى سرى غمغمت ولا حتى فيها خلفة )

المهم شربت الشاى الاسود عشان اشوف قدامى ورحت لابس كل هدومى الممكنة ومتلفح بالشال بتاع الحج – عشان البرد –وتوكلت على الله متوجها الى السريع ذو الحوادث متمنيا من العلى القدير ان يخلص اليوم على خييييييييييير

ركبت القطر اللى جه فى معاده بالملى اى انه تاخر من نص الى ساعة الا ربع ونمت او دا اللى حاولت اعمله الا ان الرياح تاتى بما لا تشتهى السفن دائما دورت على كرسى فى القطر ميكنش واصله برد وحاولت انام واذا بواحد بلدينا يدور هو التانى على حته دفا وجلس الى جنبى لزق فيا بامعنى الحرفى للكلمة عشان ندفى بعض ( ماشى عديتها واهو فعلا ندفى بعض )وهى دى المصيبة الاولانيه ..اخينا من اول ما قعد وراح مستلم ودنى وهات يارغى (قال ايه نسلى بعض ) وانا احاول جاهدا انى استقبل النوم اللى شكله هوا راخر اتخنق من اخينا وظل يحاول الهرب من عينى وانا متمسك بيه من باب ( اصبر على جارك السوء ليرحل او تيجى مصيبة تا خده ) ورحت مبرمج نفسى على ردود معينة مثل اممممممممممم او يااااااااااه او وبعدين وانا على الاخر ومش معاه خالص خالص والظاهر ان الراجل لاحظ ان انا مش معاه لقيته راح منطور واقف قلت فى سرى الحمد لله اهى فرجت ولكن ولكن ولكن لقيت الاخ راح مادد ايده فى جيبه وراح مطلع ( ايوا فعلا برافو عليكو )علبة سجاير كان شكلها غريب لكن اتضح ان الاضائة الزاهية بتاعت القطر هى الى عملت كده اتاريها سجاير سوبر ( ياااااااااادىىى الليلة الطين )وراح رامى واحدة فى حجرى ومستناش حتى رأيى واذا كنت بدخن ولا لاء وقبل ما افهم هوا فيه ايه لقيت عود كبريت مولع موجها الى عينى أأ أقصد السجارة –انتو عارفين الاضائة الزاهية – وبدأت استنشق ا لسم اللذيذ من سجارة العمر الطويل وطبعا اعزائى اطلقت مع اول نفخة دخان سراح النوم اللى راح يدور على حد تانى ناوى ينام وقبل ما اوصل لنص السجارة كانت الحموضة اشتغلت - ااه ه هوا انا مقلتلكوش عليها - طبعا سجاير وشاى عالريق ( زى ماقال الفنان زكى شان ) راح المعلم ياعينى شافنى بتوجع شوية وكان التالى

بلدينا / خير مالك يا بشمهندس ( ماهو اصل فى مصر اى حد متعرفوش يبقى بشمهندس كده مره واحدة )

انا / لا ابدا اصل الحموضة اشتغلت عندى وانت سيد العارفين بالحموضة

(قلتها ومكنش قصدى حاجة والله لكن اللى حصل , طبعا خدت محاضرة طويلة عريضة بشنبات عن الحموضة والعلاج الذى جربه سيادته ايام ماكان ا خوه بيتعالج فى مصر من الكبد والعياذ بالله وطبعا اقترح عليا بعض العلاج الاكيد المفعول وانا لا اعرف كيف يعالج مريض الحموضة بخلطة من الاعشاب الطبية على رأسها الفلفل الاحمر الدكر وكذلك الاسود)

المهم طبعا الكلام دخل من ودن وطلع من التانية .......

وجت اللحظة الحاسمة التى كنت اتمنى ان اكون نائما من اجلها انها لحظة الدين والديانة او الاصح ( الكمسرى اللى لايخلى الراكب راكب ولا اللى ماشى ماشى واللى مفلت مفلت ) وحين اقترب منا وقبل ما يقول اى كلمة راح اخونا ضارب ايده فى جيب اللحاف اللى لابسه - الجلبية – وراح مطلعله كارنيه وقاله كلمة جميلة جدا وهى بالتاكيد ( شرطة ) ولما خاب امل الاخ الكمسرى راح متدور عليا راح بلدياتنا قبل ما اى حد فينا ينطق سواء انا او الكمسرى وراح قايله ( الباشا معايا ) الله اكبر!!!!!!! ايه اللى حصل دا بصيت لقيت الكمسرى بيبصلى من ورا الدفتر بتاعه كأنه بيقولى ( فلت منى يا يا يا باشا ) فانا لا اصلح لان اكون باشا وانا احمل على كتـفى وظهرى واردافى وجميع جنبات الجسم الجميل كل هذه الاوسمة من الدهون والنشويات والكربوهيدرات وووووو الخ الخ المهم بصيت لصاحبنا باستغراب فرايت اجمل ابتسامة ممكنة على وجهه – اى من الاذن الى اللاذن – وقالى وبكل فخر احنا متعرفناش محسوبك كمال ابو يس ( تحريات مباحث ) وهنا حمدت ربى اننى تحت ضغط شديد من ابويا حلقت دقـنى وقد كان من يرانى يثنى على كثيرا ان الله فتح قلبى للاسلام ( وكأننى كنت غير ذلك)ويحسبنى من الجماعات لا سمح الله . المهم اخيرا نطقت وانا كلى امتنان لهذا المخبر الشهم الغريب لانه وفرلى من اللى كنت هاصرفه فهو مشكور على ذلك / انا متشكر جدا بس مكنش له لزمة كدة يعنى انا معايا فلوس والله العظيم فرد قائلا ياعم ولا يهمك ا نـسى ........... وكان ما امر به فنسيت...... وراح للاسف يتذكر فيما كان يحكى واخذ يسترسل فى الحديث وانا متابع فى يقظة كل حرف ينطق به ولكن لا افقه فيه اى شئ ... واخذ القطر الرخيم يتهادى فوق القطبان وكأنه فتاه تتهادى وهناك من يعكسها وقد استمتعت الفتاة بذلك واخذ القطار يخزن فى كل محطة تقابله على ما يبدو انه كان مبكرا فى موعده من وجهة نظر المحترم السواق الى ان وصل بنا بسلامة الله الى المحطة الميمونة وصول الفاتحين فى تمام الثامنة واستقبله كل المنتـظـرين استقبالا يتناسب مع الموقف فاخذ البعض يرقص طربا والبعض يلملم مصليته التى كان فيما يبدو يصلى ابتهالا لله ان يصل القطار السريييييييييع اما من تبقى له اقل القليل من العـقـل فاخذ يستعد للقفز والركل والنزال وكانه يتأهب للحرب وما ان دخل الملعون رصيفه وكنت انا بغباء منقطع النظير قد تقدمت الى الباب لاسارع بالفرار قبل الملحمة التاريخية المعهودة على كل محطة وحدث مالا يحمد عقباه فنلت نصيبى من معصيتى لربى ولوالدى بكم لا بأس به من الركلات واللكاكيم والبنيات العنترية ولم ينجينى من هذا الهلاك الا يد غليظة المنظر والملمس أذا بها تـنـتـشلنى من الهلاك تحت الاقدام وأذا به صديقى المخبر اياه فتهلل وجهى مما المنى من اثار العدوان وحاولت ان اشكره لكن لم اعرف ما قلته له الا بعض الكلام المختلط العجيب ترجمه هو على الفور الى شكروامتنان وعرفان باجميل وكان هذا كافيا . والان ايها الاعزاء ارجو الامتناع عن التدخين وان يضع كل صاحب فنجان قهوة او كباية شاى فنجانه او كبايته على جنب وان تحبسوا انفاسكم لان المغامرة الحقيقية سوف تبدأ الا ن ..........................,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

انا الان فى الحرم الجامعى اللى ودعته بلا رجعة من حوالى 6 شهور انظر الى المبانى وكأنى مهندس معمارى قدير ينظر بفخر الى ما صنعه هو على الورق وحوله العمال الغلابه بالمونة والظلط على اكتافهم الى مبانى جميلة عالية حوالى 5ادوار هدت حيلى على مدار 4 سنين ,, وبدأت اقرأ كل ما احفظ من ادعية عشان شئون الطلبة تقضيلى المصلحة على خير ثم توجهت بقلب وخطوات مهزوزة متوترة الى مكتب شئون الغلابة - الطلبة - وادخل اول مكتب وهو مكتب مديرة شئون الغلابة وكان الحوار التالى

انا / السلام عليكم ورحمة الله وبركاته يا مدام

المدام / وعليكم

انا / والله سياتك يافندم كنت عاوز اطلع شهادة بيان تقديرات الاربع سنين اللى فاتو

المدام / هو انت طالب هنا

انا / لأ حضرتك انا كنت طالب والحمد لله خلصت

المدام / وانت قديم ولا جديد

(رحت ضارب بوز عجيب ومتنح على الاخر ) ورديت عليها / نعم يعنى ايه مش فاهم بالظبط

المدام / استغفر الله العظيم من الغباوة ( وده كان اول الكلام ) يابنى انت نظام حديث ولا نظام قديم

انا / (قعت افكر ثوانى ماهو اصل انا كنت لسا مفهمتش ورحت قيلها) لآ حضرتك نظام جديد

المدام / اتفضل اطلع الدورالرابع شئون الخريجيين ( ينهار مطين هو الدور الرابع ورايا ورايا)... رحت طالع الرابع بسرعة الرابع ووقفت ربع ساعة اخد نفس عميييييييييييييييق ودخلت اول مكتب على اليمين

- صباح الخير

- الموظف / خير

- كنت عاوز اطلع بيان درجات الا ربع سنين اللى فاتو

- -الموظف / هو انت طالب هنا ( سبحان الله هما كلهم حافظين نفس الكلام )

- لآ سياتك كنت طالب هنا

- الموظف / طب اتفضل روح الخزنة ادفع رسم استخراج بيان وتعالى

- سألت متغابيا اجى هنا ؟اقصد الدور الرابع

- الموظف / طبعا..

والبقية تاتى (انتظرونى