الحكومة 2007

من طرف hamada8574 الأحد ديسمبر 16, 2007 2:28 am

دي اول مشاركة ليه في المنتدى الجميل ده وبتتكلم عن افكار الحكومة بتاعتنا في حل مشاكلنا بطريقة هزلية ونشوف افكارهم اللي اتنفذت فعلا اتمنى انها تعجبكوا واسيبكوا مع الحدوتة ويا رب تعجبكوا

الحكومة 2007

الزمان : مش بعيد اوي عن الوقت الحالي
الاشخاص : كتير قاعدين صفوف ورا بعض وفي مواجهتهم رجل هو رئيس الجلسة
الاجتماع : علشـــان تحقيق التقدم لبلدنا فسادستان
والان نفتتح الجلسة :
الرئيس : يا جماعة احنا حالتنا بقت زفت خالص في 40 % من الشعب تحت خط الفقر والعملة بتاعتنا رخصت اوي في سوق العملة واسعار الخضار عمالة تغلى ولا مشاكل البطالة ولا التعليم ولا الديون ولا عجز الموازنة ولاولاولاولا .... احنا تعبنا اوي يا جماعة كفاية لغاية كده احنا جايين النهاردة عشان نعمل حلول جذرية لحل مشاكلنا ودلوقتي كل واحد يتقدم باقتراح عشان ندرسه ونقرر تنفيذه
- تصفيق من جميع الجالسين امامه
الرئيس : ودلوقتي العضو "حكمت العفيف" وزير الاعلام يتفضل بالكلام
- واحد من الجالسين يقف ويبدأ بالكلام
حكمت : سيدي الرئيس حضرات الزملاء الافاضل انا هتكلم عن تخصصي عن تدهور حالة الاعلام في بلدنا فسادستان لو بصينا على اي دولة تانية هنلاقي عندهم قنوات تليفزيون اضعاف اضعاف اللي عندنا الصين مثلا عندها 49 قمر صناعي وشوفوا انتوا القمر الواحد بيجيب كام قناة فرنسا عندها 35 قمر اسبانيا عندها 12 قمر انا شايف ان بلدنا لازم تدخل في السباق ده لان لما يجي يوم ونطلع احنا قمر مش هنلاقيله مكان وسط كل ده لازم يا جماعة نطلع اول قمر صناعي لبلدنا وساعتها هيكون عندنا 500 قناة تليفزيون زائد ان احنا ممكن نستخدم القمر ده في النت الستالايت اظن ان الموضوع مهم جدا وريت نبدأ بيه لو عايزين نطور بلدنا وده مش هيتكلف كتير حوالي 2 مليار جنيه فسادستاني
تصفيق حاد من كل الجالسين ما عدا شخص واحد لابس زي غير مناسب للجلسة فهو لابس بالطو ابيض هو الدكتور صابر الطيب دكتور امراض النفسية والعصبية وحاطط ايده على خده وعلى رجليه رزمة ورق بيكتب فيها
الرئيس : السيد وزير التربية والتعليم قصدي وزير التعليم انا نسيت ان احنا لغينا خلاص كلمة التربية السيد حسيب بهاء الدين
حسيب بصوت اخنف وبابتسامه متفارقش واجهه : يا جماعة بالنسبه للتعليم في حاجتين بقالي كتير بسعى لتطبيقهم الاولى مش معقول ان يكون في اليابان مدة الدراسة طول السنة واجازة اخر السنة اسبوعين بس مش احنا اللي عندنا الاجازة تلت شهور بحالهم وبعدين الاطفال بيحبوا المدرسة فيها مكان مريح يقعدوا فيه الفصل مفيهوش غير سبعين طالب بس وفيها نشاطات كتير الطفل ميقدرش يعملها في البيت زي حصة الالعاب نص ساعة كل اسبوع الاطفال يلعبوا بعد ما ينضفوا الحوش والفصل انا اطالب ان تكون فترة الدراسة طوال السنة و تتلغي الاجازات خالص اما بقى بالنسبة للدروس الخصوصية فالمشكلة هنا ان الطالب بيروح بدري من المدرسة بعد ما يلعب وياكل يبدأ عشان يذاكر وياخد وقت راحة كمان الوقت الكتير اللي بعد المدرسة ده هو اللي بيخلي الطالب يدور على مدرس خصوصي عشان كده انا باقترح ان احنا نطول في عدد ساعات الدراسة اليومية بحيث ان الطالب يرجع هلكان يروح يدوب يعمل الواجب وينام ومش هيبقى عنده وقت للدروس الخصوصية وبكده نبقى قضينا على افة كبيرة من مشاكلنا الموضوع التاني والمهم جدا اللي يهمني اكتر من الموضوع الاول وفي سره "عشان الخيبة اللي كنت فيها انا" ويكمل كلامه بصوت عالي موضوع الثقافة الجنسية ميصحش تبقى دول اوروبا واميركا وكل الدول المتقدمة عندهم في المدارس حصة اسبوعية لتعليم الثقافة الجنسية واحنا معندناش دي نصيبة يا جماعة ايه يا انتوا مش خايفين على ولادكوا ولا ايه
-تصفيق حاد من جميع الجالسين ما عدا الدكتور صابر اللي قعد يكتب شوية كلام في الورق اللي معاه
الرئيس: السيد وزير النقل والمواصلات السيد فتحي مزلقان
فتحي : انا عارف طبعا هتقولي لي ايه حوادث القطر زادت اليومين دول وفي كام قطر كده دخلوا في بعض بس دي مش غلطتي دي غلطة الوزير الغبي اللي كان قبلي على العموم انا بعبقريتي المعهودة والمعروفة عني حليت المشكلة دي نهائيا واوعدكوا مش هتحصل حوادث تاني انا قللت عدد القطارات الخط اللي كان عليه عشرة بيروحو وييجو ويخبطوا في بعض هخليهم تلاتة بس ومش مهم الناس تستحمل بقى الزحمة والقطر اللي بيجي كل 4 ساعات مرة مش الغبي اللي كان قبلي عامل القطر يجي كل ساعة ليه هي الناس وراها الوزارة يعني يقفوا يستنوا شوية
- تصفيق حاد كالعادة من غير الدكتور صابر
الرئيس :العضو هايف الندمان
هايف : يا سيدي الرئيس انا شايف ان اعضاء المجلس الموقر لابد يكون ليهم لون نمر عربيات مختلف زي بتاعة الهيئة السياسية كده علشان الناس تعرف احنا مين وتوسعلنا السكة و عساكر المرور متوقفناش لو دسنا حد
الرئيس : لا موضوعك ده مرفوض لان في ارهابيين كتير في البلد وممكن يؤذونا
سيادة العضو عز ابو العز
عز : السادة الزملاء سيدي الرئيس طبعا انتوا عارفين ان انا ليه استثمارات كتيرة في البلد دي وده من حبي فيها وان انا عايز اساعد شباب بلدي وزي ما قال الشاعر لو لم اكن فسادستينيان لوددت ان اكون فسادستينيان انا بعمل حاليا مشروع هائل مجمع سكني صغير كده على البحر زائد مول وهيكون في قدامه موقف لليخوت وممر تحت الارض واصل من البحر للمجمع السكني علشان صاحب اليخت بعد ما يركنه ينزل يروح على شقته على طول وطبعا مش هحكيلكه على الشقة هخليها مفاجأة والسعر في متناول الجميع وفي تقسيط مريح جدا الشقة بعشرة مليون بس
تصفيق حاد كالعادة
الرئيس : وزير الاسكان الاستاذ السيد عمارة
السيد : انا سعيت ومازلت لاسكان الشباب عملنا مدن سكنية في الصحرا الشقة 60 متر انشاء الله يدخلها كهربا وانشاء الله نعملها مواصلاات اما بالنسبة للمياه بقى ففي عربية مياه بتعدي كل شهر يعني باختصار الشقة تحفة وفي ناس كتير بتقدم عليها بس طبعا الاختيار بيكون بالاقدمية وبنسعى للمزيد من التقدم باذن الله
الرئيس : طيب يا جماعة احنا هنكتفي بالمشاريع المهمة اللي وصلنا ليها النهاردة وهنبدأ التصويت عليها الموافق يرفع ايده اولا مشروع القمر الصناعي موافقة اجماع
بالنسبه لمشاريع التعليم بالنسبة لزيادة السنة الدراسية رفض اجماع بالنسبه لطول اليوم الدراسي موافقة اجماع بالنسبة للثقافة الجنسية يؤجل بالنسبه لمشروع القطارات موافقة اجماع
الدكتور صابر يرفع ايده طلبا للكلام
الرئيس : الدكتور صابر فليتفضل بالكلام
صابر : بعد اذنكوا اولا بالنسبه لمشروع القمر الصناعي مش اولى نعمل حاجة تانية بالفلوس دي كلها
الرئيس : وضح كلامك اكتر يا دكتور عايزنا نعمل ايه بيها
الدكتور : يعني نعمل مشروع قومي بجد نشغل بيها الاف العاطلين دول
الرئيس : الشباب لازم يعتمد على نفسه هي الحكومة هتعملوا ايه ولا ايه
يستدير الدكتور ناحية الباب ويلم اوراقه ويفتح الباب بمفتاح خاص كان في جبيه وبعد ان خرج من الغرفة الكبيرة اغلق باب الغرفة الكبيرة بالمفتاح التي لم تكن سوى غرفة في مستشفي الامراض العقلية ومشى في ردهة طويلة قابل دكتور اخر
الدكتور : ايه عملت ايه مع عنبر العقلاء
صابروعينيه تغرق بالدموع : حسبي الله ونعم الوكيل
انتهت